بالله عليك انا مجرمه والا لا...

[فزوـوـوـولها]

مرحبا حباني..! تسيف الحال؟؟ أنا؟ نحمد الله ونشكره على كل حال..
المهم .. نطنبح في الموضوع دايريكت..>>>>معها لغه!!هلا فيكم ..
مرتن من المرارير اللي زد مرت علي.. يالاخوان.. (واقعيه)
محدثتكم كانت جالسه بغرفتها تكتب شعر ,وخواطر <<تكذب كانت تمسح المرايا بالخرقه
.. حبت ذاك اليوم من الايام
الممله كالعاده أنها تسوي شئ ما ينتسوى..
؟؟؟؟؟؟؟؟؟
وش سوّت؟؟ راحت عن اختها الصغيره..
المهم جيت ولقيت اختي الصغيره يااخول حاطاتن على قناة شبابيه .. وترقص على خليلو خليلو ..<<كني رحمتها بس قلت يابنت ..ماعليك سوي الخطه ..
المهم جيت ..ومسويه نفسي حزينه ..<<تضبط الدور
قلت لها سمسم قال يالبيه <<قلت لبيتي بمنى ..قالت شكرا قلت اقطعي واخسي
قالت وش سويت قلت مدري بس دايم اسمع امي تقول هالكلمه مدري وش معناه..
قالت اخلصي وش تبين قلت ..اسمعي لازم تقبلين الموضوع ..
قالت من وين سامعه هالكلام ..هذا كلام مثقفين وانتي ماعندتس الا الدجه ..
قلت قول والله ماتقولين لااامي وابوي
قالت والله ..
قلت قولي جعلي اسقط ..<<ياقدم الحلف ماينفع بريال اللحين ..
قالت خلاص
عادانا مكتمه على الموضوع ..وكل شوي أطل اشوف احد جاء او لا
وخايفه لاتصير
حالات أغماء و...و... يعني حركات البنّي المعروفه.
المهم قلت لها اسمعي ..
تدرين انتس منتي اختنا <<ياكبرها
قالت اقول طيري تمزحين ..
قال لاوالله ماامزح <<تحلف وبقلبها تقول استغفر الله
قلت اصلا انتي بنت جيرااننا زمان وامك ماتت وابوك بعد بحادث ..
واخذك امي وابوي وربيناك
وحنا صرنا وخواتك وحبيناك ..
بس للاسف اليوم جاء لابوي عمك وقال بأخذها <<نعنبوا المزح اللي تعرفين ..
المهم سمسم سود وجهها ..
وانا اطمر عليها واحب راسها قلت امانه ..لاتعلمين امي اني علمك لان عمك بياخذك غصب وابوي يقول والله لااذبحه <<زادت الطين بله ..
قالت خلاص خلاص وهي مسح دموعها ..<<حسبي اللع عليتس فزفز ..
عاد انا من وساعه الوجه اقول بقلبي الله ضبطت الخطه ..
المهم يوم جاء من بكره ..
وجت الساعه عشر تقريبا الا التلفون يدق ..
وانا اطمر احسبه من صديقاتي الداجات اللي ماعندهن شغله الصبح ..
الا
رقم مدرسة سمسم ياماما
وانا ارد
قالت الو ..
قلت هلو ..
قالت هذا بيت سمسم
قلت لابيت جيرانهم
قالت طيب اسفه
قلت تعالي تعالي امزح معك
قالت اصغر اخوانك انا
قلت لا اكبرهم الا وطرخ تسكر بوجهي
وانا اروح لامي قلت يمه قالت وغمه <<تحب تمزح معها امها
قلت مدرسه سمسم
اتصلت
وتفز امي وتلبس عباته
واقرب ليموزين وعلى المدرسه ..
انا نسيت سالفه البارح
قلت اكيد سمسم مسويه شي ..
المهم جلست احوس وادور بالبيت ماعندي شغله ..
الا وامي وسمسم داخلين علي
والبنت وجهها اسود وتعبانه ..
المهم وناخذه ونوديها لغرفتها ..
المهم
امي تسأله وش فيك وش صاير
قولي لي انا امك ..
وانا وجهي صاير أقد السمسه <<ماتدري وش السمسمه
خايفه لاتعلم علي ..
واختي تناظر فيني وتبكي
ياليل اللي مافيه مسرى ..
امي تقول لي روحي جيبي لاختك عصير وشي تاكله
قلت ماعندنا شي خايفه اروح وتجلس هي وامي وتعلمه
قالت امي عمى بلا كذب
قلت يمه انتي روحي انا بجلس عن اختي <<الله من الخوف ..
وراحت امي ..
قالت اختي انا عجزت انسى السالفه
هنا بغيت اعطب ام السالفه واعلمها اني امزح بس خفت من امي .
قلت ماعليك انا احل الموضوع قالت كيف
قلت ماعليك <<بس بتسكته
المهم مرت الايام
واشوف اختي تذبل ...
وقلبي يتقطع عليها <<ماشالله بدت تحس
المهم الا ويجي ذاك اليوم
وتجي امي <<علمتها اختي السالفه ..
قال فزفز ولعنه ..
قلت نعم يمه دريت اني جبت العيد ..
قالت وش هاللي سويتي لاختك ..
ماتستحين ..
متى تعقلين ..ترا بخلي ابوك يحط اسمك بكرت العايله بقلم رصاص
وان زوديها مسحناك ..
وبـــــــــــــــــكل ثقه...
شرحت لها وجهة نظري من باب تغيير الجو والروتين..
قال شفتي حالت اختس وشلون
أنا خنقتني العبره
وقلت والله ما اعوده ياماما <<قديمه
واختي خليها عليه
وطلعت من عندي وانا متشققه من الخوف..>>>> وشلون تجي..؟
المهم رحت لاختي وقلت لها امزح
معك
وجبت لها جلكسي رضاوه ..
وعاد هي رخمه على طول سامحتني ..
the end
آسفه على الاطاله.. وبكيفي.
على فكره ترا القصه حقيقيه ..وش رايم مجرمه والا شو
سلامنشن

[●{الوتــَـَـِـِـِـيـن}●]

ابد انتي مو مجرمه اختي قبلك سوتها فيني بس الفرق ان اختي قالت لبيتنا كلهم
اني لقيطه وماعندي اهل وانا صكت بي الدنيا امي وابوي واخواني كلبوهم يقولون ايه صدق منتي بنتنا
وربي لليوم وانا شاكه بالوضع الا اني سالت العمه وقالت يكذبوووون انتي بنتنا وهم اللقطاء واحترت من اصدق
خهخههخهخهخه

[فزوـوـوـولها]

هههههههههههههههههههههه

.. يلعن ابو المزح اللي انتي تعرفين

.. فزفز .. يالمقروده وش منقزتس ع الضعيفه

هههههههههههههه

وربي من اتذكر ذيك السالفه افرررررررررررطها ضحكه


ياعزي عنها سمسم مصدقه الموضوع من جد


اؤ اؤ

<< داااااااااااااااخله عرض


اقووووول اذا دخلت باسمي ارد عليتس

غيووووووووووووومتس

<< كاني احس فيتس ان العبره خنقتس من شفتي اسمي

عارفه انتس مشتاقه لي

فزفز .. تذكري ايام الفروه تكفيييييييين ايام العشق الطفولي

خخخخخخخخخخخخخخخخخخ

<< مستغله الفرصه فزفز مرسلتها تجيب لي شاهي << اصغر وغادينها فزفز

هههههههههههههههههههه


الله يعيني ع الفلكه اللي بتجي

هههههههههههههههههههه

[فزوـوـوـولها]

هلا اموره ..

ياحيي انتي

حاسه فيك عقب ماشفت اختي وشلون صار شكلها ..


غيووووم اشوفك تلعبين بحسابي على كيفك

والله تزحلقني وتردرد باسمي

الخلا عن دارنا مير الخلا ..


وه بس ماانحرم منكم ثنيناتكم يالبطات على قولة غيوووووم


سلامنشن

[مرسـال الشوق]

وراك وراك يامجرمه...

الي اللحين وانا اقولك مجرمه ونص بعد ...

ابسالك ؟؟

اسمك الي اللحين بقلم الرصاص ولا امسحه من الكرت ..

شكل قلم الرصاص اللي كتب فيه اسمك قلم اصلي مايمسح ..<<< تسوينها ع اهلك
ههههههههههههههههههههه

المهم يا فز فز قصدي يالمجرمه هههههههههههههههه

اذا كنتي تبين اهون وماقولك مجرمه,, بشرط !!!!

انك تعطيني جلكسين مو واحد ..

وبعدها اقول يااا... ياااا ....

ياااا محترمه وممتازه وياعاقله << امحق عقل ... مافي امل هههههههههه


وش قلتي فيه جلكسين او لا ؟؟ سمعتي اثنين <<< مايشبعني واحد


وسلامتك ...

[فزوـوـوـولها]

هلا مرسال الشوق ..

والله انك تحطم ..

بعدين اسمع ماعندي رشاوي ..

بعدين انت لا قلت لي مجرمه تزيد من عزيمتي واصراري .. واطلع اجرامي عليك <<بتخوفه ههههههههههه


يامال العافيه مرسال


شوكرن وسهلن

سلامنشن

[سلطان زمانه]

اقول بعد السالفة ذي تلقون فزفز
بالمطبخ وسمسم على الشبابية
وبعدين الله يعين اخوتس كل شوي يشتري الضعيف
جلكسي وهو راتبه قليل يالله يكفيه
لا تشترين لأعضاء المنتدى جلكسيات
بيقضي راتب اخوك على الجلكسي

[فزوـوـوـولها]

هلا سلطان ...
لا ماعليك ...
مااطلب من اخواني ...

اجيب من فلوسي ..
حاطه ميزانيه لمثل هالمواقف خخخخخخخخخخخخ


تسلم اخوي على حضورك ...


سلامنشن

[غًـِِّـِِّ آلشًِْوٍقٌٍ ـِِّـِِّلآ]

هههههههههههههههههههههههههه

من قال مجرمه

إنتِ بذرة الإجرام بالأرض

وساكنه على قمة الإجرام .... يا المجرمه

وش استفدتي من الموضوع طيب




تسلمين يا قلبي على السالفه الحلوه











غًـِِّـِِّ آلشًِْوٍقٌٍ ـِِّـِِّلآ

[{روحـےْ ..~]

إنتِ بذرة الإجرام بالأرض

8

8

ما اقدر اقول الا اللي قالته غـ الشوق ـلا

ههههههههههههههههههههههههههههههه

المشكله ماهو واضح عليك ..

يعني اللي يشوفك يقول هذي حبوبه .. هاديه رومنسيه < وربي من جنبها .. :8:

[فزوـوـوـولها]

هلا غلو ..

حرام ....عليكم وش ذا التحطيم ...بدال ماتقولون اني جالسه اعودها على صدمات الحياه <<يألع ابو التصريف اللي كذا ....



غلو ...يسلمك قلبك ربي على حضورك والمشاركه ...


سلامنشن ياقلبوني

[فزوـوـوـولها]

<<<<<<<<<<<<<<استحت ...تقوله صادز ......

عدها كمان مره <<ماصدقت اول مره احد يمدحها

اي هين حبوبه ....


مجهول يعافيك ربي على حضورك ...والمشاركه



شوكرن وسهلن